السلام عليكم ورحمه الله وبركاته
كيفكم ان شاء الله انكم بخير وصحة وعافية
بشارككم بهالتدوينة تجاربي مع أجهزة الرياضة المنزلية الي اشتريتها وبذكر لكم مميزات وعيوب كل جهاز من وجهه نظري ومن خلال استخدامي للجهاز
علشان تتجنبون انكم تشترون جهاز مايفيدكم ثم تستخدمونة منشار للملابس 
واشتريت السير الكهربائي
في البداية تحمست وكنت امشي يوميا من نص ساعه الى ساعه
ميزة الجهاز حلو للي يحب المشي
سلبياته
ممل لازم تحطونة قدام تلفزون
مايشد الجسم لازم مع المشي تعملون تمارين مقاومة في الفترة الي كنت استخدمة صحيح نحفت بس جسمي ما انشد مرة وماكنت بهذاك الوقت اعرف حاجة اسمها تمارين مقاومة
أيضا الجهاز يحتاج مكان ووزنة ثقيل صعب التنقل والحركة
يظل بالنسبة لي جهاز ضروري بصراحة وماستغني عنه
بعدها اشتريت جهاز اوربت تراك
هالجهاز ممتاز يشد الجسم ويحرق دهون الجسم بس متعب متعب لازم له لياقة قوية
استخدمته ثلاث شهور فرق صحيح بجسمي انشد وتشكل وتخصر
لكن للأسف ما استمتع فيه الجهاز كان جنزير زي السيكل وينفرط كل شوي مانصحكم تجيبون الي يكون جنزير اللحين طالع منه مغنطييس ممتاز اشتروه – الجهاز مشابة لجهاز الغزال الطائر
^ شكل الاوبرتراك المغنطيسي
سلبيات جهاز الاوربت تراك
ممكن الاستخدام الغلط للجهاز يسبب ألم في الركبة والظهر
بعدها شريت جهاز لشد البطن
افشل افشل افشل جهاز ولا له أي فائدة
لاتاخذونة حتى لو يصير بريال ماله فائدة
وأيضا هذا جهاز ثاني لشد البطن
فاشل زي الي فوق ^
ولا له أي لازمة صرت انشر عليه الملابس
بعدها اشتريت الاستبس - Step
زي الدرج ممكن تسون فيها تمارين طلوع ونزول الدرج وانتوا بنفس الغرفة
ممتاز هالجهاز يغنيكم عن استخدام الدرج و اكثر امان من الدرج اللي ممكن الواحد يطييح اذا استخدمه في التمارين
الجهاز خفيف وسهل التنقل والحركة وممكن أيضا اذا خلصتوا تخزنونة تحت السرير
بعدها اشتريت شنطة اثقال
ممتازة هالشنطة تحتوي على كل الأوزان الي تحتاجونها في التمارين
لان انا في البداية اشتريت نص كيلو بعدين حسيت اني احتاج اكثر وشريت كيلو لما شفت اني كل شوي بشتري اثقال قررت اشتري هالشنطة
بعدها اشتريت الدراجة الثابته
بالنسبة لي كان اسوء جهاز اشتريتة بعد فترة من استخدامة صرت اسمع صوت طقطقة في ركبتي فتركته ماصرت استخدمة ماناسبني هالجهاز
وأيضا قعدته متعبة مرة اذا خصلتوا تمرين تحصلون المؤخرة متشنجة – منملة
بعدها اشتريت جهاز ميني ستيبر
الجهاز ممتاز يشد الافخاذ والجزء السفلي من الجسم وما يؤذي الركب
حبيت الجهاز صغير تقدرون اذا خلصتوا تحطونة تحت السرير ما يحتاج مساحة تخزين
مشكلته بعد فترة يطلع صوت مزعج مع ان الي عندي كله بلاستيك وتجنبت اخذ الحديد لاني عارفة انه بيطلع صوت مع ذلك حتى البلاستيك يطلع صوت يحتاج تزييت من فترة للثانية , يستحق الشراء
تجاربي لهالاجهزة خلال سنين مو بين يوم وليلة
حاليا ماصرت اشتري أي جهاز جديد لاني خلاص اقتنعت ان افضل تمارين للجسم هي تمارين المقاومة اول ماكان فيه معلومات تعرفني بهالشي لحد مابدأت ابحث واجرب بنفسي
اول فلوسي ضايعه كلها على الأجهزة لحد ما اكتشفت الحقيقة
شاركوني برأيكم حول الاجهزة في التعليقات
ان شاء الله استفدتوا من التدوينة
اشوفكم بتدوينة ثانية
مع السلامة
♥
ليست هناك تعليقات:
إرسال تعليق